【iPhone 教室】趁父親節讓爸爸變成手機高手　精選9個生活小貼士

仲有兩日就係父親節喇！大家除咗準備咗帶爸爸去食飯慶祝之外，有冇諗過喺日常生日中著手呢！小編曾經聽過唔少長輩講手機使咩問到咁貴呀？！幾千蚊部電話，是但平平哋打得到嘅電話咪得囉，有咁多功能又唔知點用等等等等嘅問題，不如就趁今年父親節教吓爸爸一啲手機貼士，等爸爸都可以成為 iPhone 高手呀！

小編今年就整理咗10個比較常用嘅生活小貼士畀大家！

1. 依據爸爸嘅嗜好、習慣，推薦幾個實用 iPhone apps ，為佢嘅 iPhone 安裝一啲簡單實用嘅 app （如：《RTHK News》、《NOW 新聞》、《1Password》），適合爸爸日常所需，令佢喺朋友間成為「科技高手」，仲可以趁機同朋友晒吓自己子女嘅！

2. 簡單幾步，為爸爸嘅 iPhone 或 Apple Watch 加入八達通 ，如果爸爸用緊長者八達通，只要將佢嘅八達通實體卡（租用版及個人版都得）加入 iPhone 或 Apple Watch 亦好方便，快捷之餘又有安全保障，仲可以免卻接觸其他裝置、按鈕、找換現金或老人家唔見八達通。

3.老人家視力點都唔夠年青人好，依個時候就可以利用手機中一啲設定，令爸爸用起嚟時更方便舒服：

• 放大鏡：iPhone 或 iPad 可變成爸爸嘅隨身放大鏡，仲可以新增為輔助使用快捷鍵。

• 文字大小：於「設定」當中打開「輔助使用功能」>「顯示與文字大小」>「放大文字」>開啟 「更大的輔助使用字體」，即可啟動更大嘅動態字體，於眾多內置 App 及支援的第三方 App 所顯示嘅文字，亦會相應地調整尺寸，也可以選擇粗體文字。

4. 老人家就性唔好，有時會好容易唔記得嘢，但又唔敢問你，怕煩到你？依個時候就要教識爸爸召喚 Siri 喇！

例如爸爸只要對 Siri 講：「喂 Siri，開電筒！」Siri 就會自動啟用電筒功能。

5. 用慣咗 iPhone 嘅大家自然對 AirDrop 一啲都唔陌生，但如果你爸爸都係用緊 iPhone，可能就未必會用，如果教識咗佢哋，咁以後就可以唔使再經過其他app壓縮咗張相或文件先可以用人哋分享靚相喇～

6. 溫馨嘅家庭相、旅行影片，長埋喺手機相簿，不如教爸爸重新整理照片圖庫，繼著日嘅歡樂時光整成幻燈片或自動編輯成影片！

「相片」會自動掃描圖庫中有意義嘅人物、地點、假期等等，將其分類呈現喺名為「回憶」 嘅精選集中。爸爸選亦可以喺圖庫中選擇相片建立自己嘅「回憶」、以幻燈片或自動編輯成影片與親友分享。

7.  設定家人共享，爸爸唔使重複購買 apps 或服務 ，因為手機中嘅「家人共享」功能可以畀係你與最多五位家庭成員，輕鬆地分享購買自 App Store 嘅內容，就連 Apple Music 及 Apple TV+ 嘅家庭收費計劃都得；喺設定購買共享功能後，任何家庭成員曾購買或下載嘅歌曲、專輯、電影及 App，都即時可被群組內嘅所有人存取，全新內容會出現喺每位家庭成員嘅 App Store 已購買項目之中。

此外，你亦可與家人分享相簿和家庭日曆，以及當有人遺失裝置你亦可以幫助追蹤！

8. 毋須通電話、報平安，實時掌握家人身在何處。想隨時知道家人身在何處，或想同佢報備你嘅行蹤...iOS 13 或以上版本嘅「尋找」app 就可以幫你即時與家人或朋友分享你嘅位置。

如果你已經添加家人嘅 Apple ID 成為家庭成員，你更可以直接分享彼此嘅位置：
於 Apple ID 中嘅「家人共享」，打開「位置分享」，揀選家人嘅名字後。選擇「分享我的位置」，咁其家人嘅手機就可以睇到你嘅位置之餘，同時他亦會收到分享位置嘅邀請。

但如果你未將家人嘅 ID 加為你嘅家庭成員，咁你就要喺App 中嘅「成員」標籤頁，選擇「+ 分享我的位置」，輸入家人嘅聯絡人姓名或電話號碼後傳送邀請。當佢收到你嘅邀請後，佢就可以選擇幾時分享佢嘅位置畀你個：「只分享一個小時」、「分享到當日結束」或「永久分享」。

9.家人各有各忙，好難約齊人食飯？！依個時候你就需要用到共享「家庭」日曆依個功能喇！

喺設定「家人共享」後，所有家庭成員裝置嘅「日曆」 中會自動製作一個名為「家庭」嘅共享日曆。你可以喺日曆上排定一家人嘅行程：開啟手機中「日曆」 ，然後加入行程；進入行程詳細資料時，選「日曆」，然後點選「家庭」來將行程加入家庭日曆。

最後小編提提大家記得幫爸爸設立佢專屬嘅 Apple ID 呀！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）